სამართალდამცველებსა და კანცელარიასთან გამართული კონტრაქციის მონაწილეებს შორის დაპირისპირება მოხდა. „ლიბერალის“ კორესპონდენტის ცნობით, პოლიციამ კონტრაქციის სავარაუდოდ 3 მონაწილე ტერიტორიიდან გაიყვანა და სავარაუდოდ, დააკავა.
კანცელარიასთან პრაიდის აქტივისტები აქციის გამართვას აპირებდნენ, თუმცა აქციის დაწყებამდე მთავრობის ადმინისტრაციასთან გურამ ფალავანდიშვილი, ზვიად ტომარაძე, ბიზნესმენი ლევან ვასაძე, რამდენიმე სასულიერო პირი და მათი მხარდამჭერები აქციის ჩასაშლელად შეიკრიბნენ.
პრაიდის აქტივისტებს კანცელარიასთან მისვლის საშუალება არ მიეცათ და აქციის გამართვა კიბეებზე დაიწყეს. კონტრაქციის მონაწილეები მათ ჰომოფობიური შეძახილებით შეხვდნენ, ერთ-ერთმა მონაწილემ პრაიდის აქტივისტების მისამართით ბოთლიც ისროლა.
