ტელეკომპანია „მთავარმა არხმა“, როგორც იურიდიულმა სუბიექტმა, ფუნქციონირება უკვე დაიწყო. როგორც მისი დამფუძნებელი და საკონტროლო პაკეტის მფლობელი ნიკა გვარამია გვპირდება ტელეკომპანია ეთერში იმაზე მალე გავა, ვიდრე გვგონია.
„რუსთავი 2-ის“ ყოფილი გენერალური დირექტორი საჯარო რეესტრიდან ამონაწერსაც აქვეყნებს, რომლის მიხედვითაც ტელეკომპანიის საკონტროლო, 51 პროცენტის მფლობელი ნიკა გვარამია იქნება, ხოლო 49 პროცენტის მესაკუთრე კომპანია „ინტერმედიას“ ერთ-ერთი მეწილე კახაბერ ანჯაფარიძე. ამასთან, დოკუმენტის მიხედვით, არხის გენერალური დირექტორი ნიკა გვარამიაა, ფინანსური დირექტორი ირაკლი ნიჟარაძე, დირექტორებად კი „რუსთავი 2-ის“ ყოფილი იურისტები - დიმიტრი საძაგლიშვილი და თამთა მურადაშვილია მითითებული.
როგორც გვარამია „ფეისბუკზე“ წერს, წილების მოცემული განაწილება დროებითი და პირობითია. „მალე გაიგებთ ინვესტორების, შენობის, სიხშირის და, თქვენი დიდი იმედი გვაქვს, ანგარიშის შესახებ, რომელზე თქვენი შემონატანი ერთი ლარიც კი ძალიან დაგვეხმარება ჩვენ და იქნება ინვესტიცია საქართველოს დასავლურ და დემოკრატიულ მომავალში“.
