პოლიციამ ცოლად შერთვის მიზნით, 19 წლის გოგონას მოტაცების გამო ორი პირი თბილისში დააკავა. როგორც შინაგან საქმეთა სამინისტროდან იტყობინებიან, შემთხვევა გარდაბნის მუნიციპალიტეტის სოფელ თაზაქენდში მოხდა. 29 წლის ფ. ა-მ და 28 წლის ი.ა-მ 19 წლის გოგონა ავტომანქანაში იძულებით ჩასვეს და მარნეულის მიმართულებით წაიყვანეს. სოფელ ქეშალოში მისვლისას, გოგონამ გაქცევა მოახერხა. შემთხვევის ადგილიდან მიიმალნენ გამტაცებლებიც.
შსს-ს ინფორმაციით, სამართალდამცველებმა, ინტენსიური საგამოძიებო მოქმედებების შედეგად, ორივე ბრალდებული მოსამართლის განჩინების საფუძველზე, თბილისში დააკავეს.
სისხლის სამართლის საქმე წინასწარი შეთანხმებით ჯგუფის მიერ თავისუფლების უკანონო აღკვეთის ფაქტზე აღიძრა. დანაშაული 7-დან 10 წლამდე ვადით თავისუფლების აღკვეთას ითვალისწინებს.
