შინაგან საქმეთა სამინისტრომ, 6 ოქტომბერს, ლისის ტბის მიმდებარე ტერიტორიაზე მომხდარი განზრახ მკვლელობის ფაქტი გახსნა და დანაშაულის ჩადენაში ბრალდებული ხუთ პირზე ძებნა გამოაცხადა.
გამოძიების ვერსიით დანაშაულის მოტივი გახდა გარდაცვლილს - 1979 წელს დაბადებულ გ.ვ.-ს და ერთ-ერთ ბრალდებულს შორის მკვლელობის წინა დღეს მომხდარი სიტყვიერი დაპირისპირება. ბრალდებულებმა: 1979 წელს დაბადებულმა დ. რ-მ, 1986 წელს დაბადებულმა ვ.კ-მ, 1980 წელს დაბადებულმა ნ.კ-მ, 1979 წელს დაბადებულმა ზ.მ-მ და 1977 წელს დაბადებულმა დ. ბ-მ მიმდინარე წლის 6 ოქტომბერს, თბილისში, აკაკი გახოკიძის ქუჩაზე, წინასწარი შეთანხმების საფუძველზე, იარაღის მუქარითა და ფიზიკური ძალის გამოყენებით, იძულებით, უკანონოდ აღუკვეთეს თავისუფლება 1979 წელს დაბადებულ გ.ვ.-ს. ამის შემდეგ ლისის ტბისა და ბრიტანული სკოლის მიმდებარე ტერიტორიაზე, მოკვლის განზრახვით, ჯგუფურად, დანისა და ცეცხლსასროლი იარაღის გამოყენებით, მათ გ.ვ.-ს სხეულზე სიცოცხლისთვის სახიფათო დაზიანებები მიაყენეს, რის შედეგადაც იგი საავადმყოფოში გარდაიცვალა.
გამოძიება, დამამძიმებელ გარემოებაში ჯგუფურად ჩადენილი განზრახ მკვლელობის, დამამძიმებელ გარემოებაში ჯგუფურად ჩადენილ განზრახ მკვლელობაში დახმარების და წინასწარი შეთანხმებით ჯგუფის მიერ თავისუფლების უკანონოდ აღკვეთის ბრალდებით მიმდინარეობს. ვინაიდან ხუთივე ბრალდებული მიიმალა და თავს არიდებს საგამოძიებო ორგანოში გამოცხადებას, მათზე გამოცხადებულია ძებნა.
ჩადენილი დანაშაული 7-დან 17 წლამდე ვადით თავისუფლების აღკვეთას ითვალისწინებს.