გლდანში მდებარე კაზინო „ბეთლაივში“ გაზის გაჟონვის შედეგად მოწამლული ოთხი გოგონა სასწრაფო დახმარების ბრიგადამ კლინიკა „მედისონში“ გადაიყვანა. საავადმყოფოს პერსონალის ინფორმაციით პაციენტების სიცოცხლეს საფრთხე არ ემუქრება.
„თბილისი ენერჯის“ ინფორმაციით, „გლდანში, ხიზანიშვილის ქუჩაზე მიმდინარე სამუშაოებისას კომპანია NCC-მ საშუალო წნევის გაზსადენი დააზიანა, რის შედეგად 350 აბონენტს ავარიულად შეუწყდა გაზმომარაგება“. კომპანიის სპეციალისტთა შეფასებით, სავარაუდოდ, მილის დაზიანების გამო გაზმა კაზინო „ბეთლაივში“ და აფთიაქ „ფარმადეპოში“ ვენტილაციის არხებით შეაღწია. ადგილზე გამოიძახეს საპატრულო პოლიციაც, რომელმაც ხალხის ევაკუაცია მოახდინა და შენობები გაანიავა. ამ ეტაპზე მიმდინარეობს საგამოძიებო მოქმედებები, რისი დასრულებისთანავე სარემონტო სამუშაოები დაიწყება. "კომპანია „თბილისი ენერჯი“ ბოდიშს უხდის აბონენტებს მისგან დამოუკიდებელი მიზეზებით შექმნილი დისკომფორტისთვის. გაზის მიწოდება სარემონტო სამუშაოების დასრულებისთანავე, ეტაპობრივად აღდგება“ , - ნათქვამია „თბილისი ენერჯის“ მიერ გავრცელებულ განცხადებაში.
შინაგან საქმეთა სამინისტრომ მომხდარზე გამოძიება გაზის ობიექტზე ექსპლუატაციის წესის დარღვევის მუხლით დაიწყო.