ფილმის „და ჩვენ ვიცეკვეთ“ რეჟისორი ლევან აკინი სოციალურ ქსელ წერს, რომ სამწუხაროდ, ბნელ დროში ვცხოვრობთ და დაგეგმილი პროტესტი ამტკიცებს, რომ სასიცოცხლოდ მნიშვნელოვანია ამ ჩრდილოვან ძალებს ყველა შესაძლო საშუალებით გავუწიოთ წინააღმდეგობა.
როგორც რეჟისორი აღნიშნავს, ძალიან ბევრმა ადამიანმა ჰკითხა, თუ რა ხდება საქართველოში 8 ნოემბერს ფილმის პრემიერასთან დაკავშირებით.
„ზოგიერთი მემარჯვენე ჯგუფები და ეკლესია გეგმავენ, რომ შეაჩერონ ადამიანები კინოთეატრებში შესვლისგან, სადაც ყველა ბილეთი გაიყიდა. აბსურდია, რომ ადამიანებს, რომლებმაც ბილეთები იყიდეს, სიმამაცე სჭირდებათ. უფრო მეტიც, შესაძლოა, თავდასხმის რისკის ქვეშ დგებიან უბრალოდ იმიტომ, რომ ფილმის სანახავად მიდიან.
მე ეს ფილმი სიყვარულითა და თანაგრძნობით შევქმენი. ეს არის ჩემი სასიყვარულო წერილი საქართველოსა და ჩემი მემკვიდრეობის მიმართ. ამ ამბით მსურდა საქართველოს კულტურის აღდგენა და ხელახლა განსაზღვრა, მისი სრულად წარმოჩენა და არა მხოლოდ გარკვეული ნაწილის", - წერს ლევან აკინი.
ქართული წარმოშობის შვედი რეჟისორის, ლევან აკინის ფილმის „და ჩვენ ვიცეკვეთ“ პრემიერა საქართველოში დღეს, 8 ნოემბერს გაიმართება.
