ბათუმში, მშენებარე კორპუსში მუშის გარდაცვალების ფაქტზე სისხლის სამართლის საქმეზე გამოძიების პარალელურად, მოკვლევას შრომის ინსპექციის წარმომადგენლებიც აწარმოებენ.
უბედურის შემთხვევის დროს 23 წლის ახალგაზრდა ფასადის სამღებრო სამუშაოებს ასრულებდა. როგორც „აჭარის ტელევიზია“ იუწყება, შრომის უსაფრთხოების ინსპექტორების ვერსიით, დაჟანგებულმა ბაგირმა სიმძიმეს ვერ გაუძლო და გაწყდა. მუშა დაახლოებით მე-10 სართულის სიმაღლიდან გადმოვარდა და ადგილზე გარდაიცვალა.
უბედური შემთხვევა ბათუმში, 26 მაისისა და ბესიკის ქუჩების გადაკვეთაზე მდებარე კორპუსში მოხდა. სამშენებლო სამუშაოებს კომპანია "გიგერო" აწარმოებს.
შინაგან საქმეთა სამინისტრომ გამოძიება, სისხლის სამართლის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.
