2021 წლის შემოდგომაზე, ბრიტანული საბავშვო გამომცემლობა Farshore-ი დათვი ვინი პუჰის შესახებ ახალ სათავგადასავლო წიგნს გამოსცემს. ის ინგლისელი მწერლის, ალან მილნის ორიგინალური ისტორიის „პრიკველია“.
მწერალ ჯეინ რიორდანის მოთხრობების კრებული „Winnie-the-Pooh: Once There Was a Bear“ 30 სექტემბერს გამოვა. ის გაფორმებულია მხატვარ მარკ ბერჯესის ილუსტრაციებით. გამოცემის თარიღი ემთხვევა ვინი-პუჰის შესახებ პირველი წიგნის გამოცემის 95-ე წლისთავს. კრებული ალან მილნის სტილში დაწერილი 10 მოთხრობისგან შედგება, ილუსტრაციები კი პირველი ვინი პუჰის იერსახის შემქმნელი ინგლისელი მხატვრის, ერნესტ შეპარდის ნახატების იმიტაციაა.
„Winnie-the-Pooh: Once There Was a Bear“ („ვინი-პუჰი: იყო და არა იყო რა დათუნია“) ვინი პუჰის შესახებ ისტორიის პირველი პრიკველია, რომლის გამოცემაზეც მილნის და შეპარდის მემკვიდრეები დათანხმდნენ.
წიგნი იმის თხრობით იწყება, თუ როგორ გადასახლდა მაღაზია Harrod-ის თაროდან ვინი-პუჰი კრისტოფერ რობინის სახლში. სწორედ Harrods-ში იყიდა ალან მილნმა 1921 წელს სათამაშო დათვი თავისი შვილის, კრისტოფერ რობინისათვის. წიგნში ვინი პუჰი ასევე სტუმრობს ბუნების ისტორიის მუზეუმს და ლონდონის ზოოპარკს, სადაც გაიცნობს სეხნია დათვ ვინიპეგს (ან ვინის), რომელიც ზოოპარკში 1915-34 წლებში ცხოვრობდა. ალან მილნი და მისი შვილი რეალურ ცხოვრებაში ხშირად სტუმრობდნენ ზოოპარკს, კრისტოფერ რობინს კი ვინიპეგი ისე მოსწონდა, რომ თავის სათამაშო დათუნიას მისი სახელი დაარქვა.
ჯეინ რიორდანს ალან მილნის სტილში ვინი პუჰის შესახებ მანამდე ორი წიგნი აქვს დაწერილი. მისი თქმით, პრიკველი ეფუძნება რამდენიმე ისტორიას კრისტოფერ რობინის რეალური ცხოვრებიდან, ამიტომ ჩნდება წიგნში Harrods-ი და ზოოპარკი.
1960-იანი წლებიდან ალან მილნის პერსონაჟების გამოყენების უფლება აქვს კომპანია Disney-ს. იმავდროულად, მწერლის ნაწარმოებებზე უფლებას მისი მემკვიდრეები ინარჩუნებენ. ახალი წიგნის გამოცემაში Disney არ მონაწილეობდა.