საქართველოს ტერიტორიული მთლიანობის პრობლემა კვლავ არსებობს საერთაშორისო თანამეგობრობისთვისაც,- ამის შესახებ გუშინ საქართველოს პრეზიდენტთან ერთად გამართულ პრესკონფერენციაზე საფრანგეთის პრეზიდენტმა ფრანსუა ოლანდმა განაცხადა.
მისი თქმით, 2008 წლის 12 აგვისტოს შეთანხმებამ სრული ასახვა ვერ ჰპოვა.
"2008 წელს საფრანგეთი ევროკავშირის თავმჯდომარე ქვეყანა იყო და მან ყველაფერი გააკეთა, რომ ქვეყნებს შორის შეთანხმება მიღწეულიყო და გაჩერებულიყო ომი, მაგრამ ვნახეთ, რომ ოკუპაციას მაინც აქვს ადგილი და საქართველოს ტერიტორიული მთლიანობის აღდგენა ისევ მისაღწევია, ასევე მაშინ დადებულმა შეთანხმებამ, რეალურად, სრულად ასახვა ვერ ჰპოვა", - განაცხადა ფრანსუა ოლანდმა.
მისივე თქმით, საქართველოში მისი ვიზიტი მხოლოდ ერთ მიზანს ისახავს - გამოხატოს საფრანგეთის მხარდაჭერა საქართველოსადმი, მხარი დაუჭიროს საქართველოს სუვერენიტეტს და ტერიტორიულ მთლიანობას, მხარი დაუჭიროს ასოცირების შეთანხმებას ევროკავშირსა და საქართველოს შორის.
