უკრაინის საპრეზიდენტოს არჩევნების წინასწარი შედეგების მიხედვით, ვადამდელ საპრეზიდენტო არჩევნებში ხმათა თითქმის 55%-ით პეტრე პოროშენკო ლიდერობს, მეორე ადგილზე კი თითქმის 13 %-ით ქვეყნის ექს-პრემიერი, იულია ტიმოშენკოა.

პარალელურად კიევის მერის არჩევნების წინასწარი მონაცემებით, პირველ ადგილზე 56,26%-ით პარტია " УДАР"-ის ლიდერი ვიტალი კლიჩკოა.  

უკრაინის ცენტრალური საარჩევნო კომისიის თავმჯდომარის განცხადებით, ქვეყანაში არჩევნების მეორე ტურის ჩატარება აუცილებელი არ არის.  

"ჩვენს ხელთ არსებულ ინფორმაციაზე დაყრდნობით შეგვიძლია განვაცხადოთ, რომ არ არსებობს არჩევნების მეორე ტურის ჩატარების აუცილებლობა. უკრაინის ახალი პრეზიდენტი 2014 წლის 25 მაისს ავირჩიეთ. მას შემდეგ, რაც ყველა კანონიერი პროცედურა დასრულდება, პეტრე პოროშენკო ქვეყნის ახალი პრეზიდენტი გახდება", - აღნიშნა საარჩევნო კომისიის თავმჯდომარემ. 

შეგახსენებთ, რომ ვადამდელი საპრეზიდენტო არჩევნები უკრაინის რადამ მას შემდეგ დანიშნა, რაც 2014 წლის თებერვლის ბოლოს ქვეყნის იმდროინდელი პრეზიდენტი ვიქტორ იანუკოვიჩი პოსტიდან გადააყენა.