„ნაციონალური მოძრაობა" თბილისის არქიტექტურის სამსახურის უფროსის თანამდებობაზე ნინო ღოღობერიძის დანიშვნას ეწინააღმდეგება.
სევდია უგრეხელიძის თქმით, არქიტექტურის სამსახურის ხელმძღვანელი კანონის დარღვევით ინიშნება.
„არ შეიძლება არქიტექტურის სამსახურის ხელმძღვანელის ამ წესით დანიშვნა. აუცილებელია, ამ თანამდებობაზე დანიშვნისთვის გამოცხადდეს კონკურსი. დანიშვნას საკრებულო ახორციელებს, მაგრამ შერჩევა უნდა მოხდეს კონკურსის წესით. ძალიან ბევრი არქიტექტორია თბილისში, რომელიც კონკურსში მიიღებდა მონაწილეობას, თავიანთ ხედვებს წარმოადგენდა და კონკურსის წესით კანონის შესაბამისად იქნებოდნენ შერჩეული", - განაცხადა სევდია უგრეხელიძემ.
ამ საკითხზე განმარტება გააკეთეს საკრებულოშიც. იურიდიული კომისიის თავმჯდომარის თედო კობახიძის თქმით, ნინო ღოღობერიძე არა არქიტექტურის სამსახურის უფროსის, არამედ მოვალეობის შემსრულებლის თანამდებობაზე დაინიშნება, რასაც კონკურსის გამოცხადება არ სჭირდება.
