„თბილისის მერიაზე ფინანსთა სამინისტროს საგამოძიებო სამსახურის მასშტაბური თავდასხმა მიმდინარე საქმიანობასთან არაფერ კავშირშია და მისი მიზანი იქ მომუშავე ადამიანების დაშინება და იძულებაა“, - ამის შესახებ თბილისის საკრებულოში „ნაციონალური მოძრაობის" ორი ფრაქციის ერთობლივ განცხადებაშია ნათქვამი.
„მასშტაბურად ხდება ადამიანების იძულება, დატოვონ სამსახურები, მხოლოდ იმიტომ, რომ მომავალში მათი ადგილები „ქართული ოცნების“ აქტივისტებმა და ხელისუფლების წარმომადგენელთა ნათესავებმა დაიკავონ", - აცხადებენ „ნაციონალურ მოძრაობაში".
განცხადების თანახმად, ფრაქციები თბილისის მერისგან იმ ტექსტის გასაჯაროებას მოითხოვენ, რომლის საფუძველზეც ფინანსთა სამინისტროს საგამოძიებო სამსახურმა შემოწმება დაიწყო.
„ლიბერალთან" საუბრისას ფინანსთა სამინისტროს საგამოძიებო სამსახურმა დაადასტურა, რომ საგამოძიებო მოქმედებები სამინისტრომ დავით ნარმანიას მიმართვის შემდეგ დაიწყო.
გამოძიება სისხლის სამართლის კოდექსის 182-ე, 218-ე მუხლებით მიმდინარეობს, რაც მითვისება-გაფლანგვასა და გადასახადებისაგან თავის არიდებას ითვალისწინებს.
