საჯარო სამსახურის ბიუროს ვებგვერდზე გამოქვეყნებული ქონებრივი დეკლარაციის მიხედვით, საქართველოს პრეზიდენტი გიორგი მარგველაშვილი ორ საცხოვრებელ სახლსა და ხუთ მიწის ნაკვეთს ფლობს.

გიორგი მარგველაშვილს ერთი საცხოვრებელი ბინა თბილისში, პაოლო იაშვილის ქუჩაზე აქვს, რომლის ფართობიც 120 კვ.მ-ს შეადგენს, მეორე საცხოვრებელი სახლი კი დუშეთში, სააკაძის ქუჩაზე, ფართობით - 200 კვ.მ.

რაც შეეხება საბანკო ანგარიშებს, პრეზიდენტს „თი-ბი-სი" ბანკში ერთი საბანკო-სახელფასო ანგარიში აქვს და მასზე, ქონებრივი დეკლარაციის მიხედვით, 3 948,73 ლარი ერიცხება.

დეკლარაცია არ შეიცავს მონაცემებს ოჯახის საკუთრებაში არსებული მოძრავი ქონების შესახებ, რომელთაგან თითოეულის ღირებულება 10 000 ლარს აღემატება. ასევე, პრეზიდენტი არ ფლობს ფასიან ქაღალდებს. მონაცემები არ ფიქსირდება არც იმ გრაფაში, რომელიც მისი ან მისი ოჯახის რომელიმე წევრის სამეწარმეო საქმიანობაში მონაწილეობას შეეხება. ცარიელია გრაფა, მიუღია თუ არა მას ან მისი ოჯახის წევრს წინა წლის პირველი იანვრიდან 31 დეკემბრის ჩათვლით საჩუქარი, რომლის ღირებულება 500 ლარს აღემატება. 

პრეზიდენტს დეკლარაციაში ოჯახის წევრებად მითითებული ჰყავს: მამა – თეიმურაზ მარგველაშვილი, დედა – მზეანა გომელაური და შვილი ანა მარგველაშვილი.

პრეზიდენტმა ქონებრივი დეკლარაცია 2014 წლის 7 აგვისტოს შეავსო.