„ხაჯიმბა აფხაზეთის ტერიტორიაზე მცხოვრები ქართველების გააფხაზების პოლიტიკას გაატარებს. ისინი კანონს მოიშველიებენ. როგორც ხაჯიმბა და სხვა პოლიტიკოსები ამბობენ, არ შეიძლება, ადამიანი ერთდროულად იყოს საქართველოსა და აფხაზეთის მოქალაქე“, - აღნიშნავს ფრაქცია "ქართული ოცნების" თავმჯდომარე გია ვოლსკი „ლიბერალთან“ საუბარში.
ვოლსკი მიიჩნევს, რომ ხაჯიმბა შეეცდება, საზოგადოების დიდ ნაწილს საქართველოს მოქალაქეობაზე უარი ათქმევინოს. საპარლამენტო უმრავლესობის წევრის თქმით, რუსეთის ინტერესს ქართველებისა და აფხაზების გათიშვა წარმოადგენს, თუმცა აფხაზეთში მცხოვრები მოსახლეობის დიდი ნაწილი მსგავსი პოლიტიკური იზოლაციის წინააღმდეგია.
რაც შეეხება აფხაზეთის ახალი ე.წ. პრეზიდენტის არჩევის შემდგომ რუსეთთან აფხაზეთის ურთიერთობის საკითხს, გია ვოლსკი მიიჩნევს, რომ აფხაზეთის რუსეთთან ინტეგრაცია ძნელი განსახორციელებელი იქნება. „აფხაზებს დამოუკიდებლობა სურს და დამოუკიდებლობის იდეა არც ერთ კანდიდადტს დღის წესრიგიდან არ მოუხსნია. საზოგადოების განწყობას თუ შევაფასებთ, აფხაზური ეთნოსის ძალიან დიდი ნაწილი რუსეთთან ინტეგრაციის მომხრე არ არის“, - ამბობს ვოლსკი.
საპარლამენტო უმრავლესობის წევრის თქმით, ხაჯიმბას რუსეთთან ღრმა ასიმილაციის პოლიტიკის გატარება გაუჭირდება.