„ჩვენ ყირიმში ასეთი ადამიანები არ გვჭირდება“ - განაცხადა 2 სექტემბერს ყირიმის დე ფაქტო პრემიერ-მინისტრმა, სერგეი აკსიანოვმა, ყირიმელი ლგბტ თემის წარმომადგენლების შესახებ.
აკსიანოვის თქმით, იმ შემთხვევაში, თუ ლგბტ აქტივისტები რეგიონში დემონსტრაციის მოწყობას შეეცდებიან, „პოლიცია და თავდაცვის ძალები მაშინვე მოახდენენ რეაგირებას და სამ წუთში აუხსნიან მათ, როგორი სექსუალური ორიენტაციაა უმჯობესი“.
სერგეი აკსიანოვს რუსი ლგბტ აქტივისტი, იგორ კოჩეტკოვი, გამოეხმაურა, რომელმაც პოლიტიკოსისა და რეგიონის ხელმძღვანელის მხრიდან ასეთი განცხადება მიუღებლად მიიჩნია: „აკსიანოვის გადასაწყვეტი არ არის, ვინ იცხოვრებს ყირიმში და ვინ - არა. ეს არის საშინელი განცხადება, რადგან განურჩევლად სექსუალური ორიენტაციისა, აკსიანოვს არავინ ეკითხება, ვინ სად იცხოვრებს.“
იურისტისა და ლგბტ აქტივისტის, ნიკოლაი ალექსეევის, თქმით, აკსიანოვის განცხადება წმინდად პოლიტიკურია, რადგან მსგავსი ქმედებები არღვევს კანონს (საჯარო თავშეყრის შესახებ) და რუსეთის საერთაშორისო ვალდებულებებს.
ალექსეევი ყირიმის დე ფაქტო მინისტრ სერგეი აკსიანოვს მის უფლებამოსილებას ახსენებს - „თუ ყირიმი რუსეთის ნაწილი გახდა, მაშინ იგი ფედერალურ კანონს უნდა დაემორჩილოს, რომლის თანახმადაც, მისი თანამდებობის პირს ფედერალური საქმეების გადაწყვეტის უფლება არა აქვს“.
