„ღია მმართველობა საქართველოს“ 2014-2015 წლების სამოქმედო გეგმის ფარგლებში საქართველო ინფორმაციის თავისუფლების შესახებ კანონის შემუშავების ვალდებულებას იღებს. სამოქმედო გეგმის პროექტი იუსტიციის მინისტრის წარდგენით საქართველოს მთავრობამ დღეს დაამტკიცა. 

გეგმა 27 ვალდებულებას ითვალისწინებს, მათ შორის - პეტიციების ელექტრონული სისტემის შექმნას, ღია მონაცემების პორტალის (www.data.gov.ge) ამოქმედებას, საჯარო სამსახურში მიღების მიუკერძოებელი წესების შემუშავებას, ფარული მიყურადების შესახებ სასამართლო სტატისტიკის გამოქვეყნებასა და საზოგადოებრივი ცენტრების განვითარებას.

გაერთიანება „ღია მმართველობის პარტნიორობა“ (Open Government Partnership - OGP) აშშ-ისა და ბრაზილიის პრეზიდენტების ინიციატივით, 2011 წელს დაფუძნდა. მისი მიზანია მთავრობათა გამჭვირვალობის, ანგარიშვალდებულებისა და ეფექტიანობის გაზრდა. „ღია მმართველობის პარტნიორობა“ 64 სახელმწიფოს აერთიანებს.