საქართველოს განათლებისა და მეცნიერების სამინისტრომ დღეს პროფესიული განათლების მიღების მსურველთა რეგისტრაცია დაიწყო. იგი 20 სექტემბრის ჩათვლით გაგრძელდება.

"ყველა დაინტერესებულ პირს აქვს შესაძლებლობა სახელმწიფო დაფინანსებით დაეუფლოს მისთვის სასურველ პროფესიას ტურიზმის, მშენებლობის, სოფლის მეურნეობის, ინფორმაციული ტექნოლოგიების, მომსახურებისა და სხვა მიმართულებით. სწავლა შესაძლებელია სახელმწიფოს მიერ დაფუძნებულ 33 საგანმანათლებლო დაწესებულებაში, რომელიც  პროფესიულ საგანმანათლებლო პროგრამებს ახორციელებს",- აღნიშნულია სამინისტროს ოფიციალურ ვებ გვერდზე გავრცელებულ განცხადებაში.

სამინისტროს ინფორმაციით, რეგისტრაციის გავლა საქართველოს მასშტაბით არსებულ საინფორმაციო ცენტრებში, სამინისტროს საგანმანათლებლო რესურსცენტრებსა და პროფესიული საგანმანათლებლო პროგრამების განმახორციელებელ  დაწესებულებაშია შესაძლებელი. მსურველმა თან უნდა იქონიოს პირადობის მოწმობა.

რეგისტრაციის დასრულების შემდეგ, დარეგისტრირებულმა აპლიკანტმა საწყის საფეხურზე სწავლის დასაწყებად უნდა გაიაროს სამინისტროს შეფასებისა და გამოცდების ეროვნული ცენტრის მიერ  ორგანიზებული პროფესიული  ტესტირება. საფეხურიდან საფეხურზე გადასვლისა და სწავლის გაგრძელების მსურველები კი, პროფესიულ საგანმანათლებლო დაწესებულებაში რეგისტრაციის შემდეგ, თავად დაწესებულების მიერ ორგანიზებულ ტესტირებას გაივლიან.

განათლებისა და მეცნიერების სამინისტროს ინფორმაციით, პირველად, ზემოაღნიშნული პროცედურების გავლით აპლიკანტთა  პროფესიულ საგანმანათლებლო პროგრამებზე ჩარიცხვა, გასული წლის (2013) შემოდგომაზე, ხოლო მეორედ, მიმდინარე წლის (2014) გაზაფხულზე განხორციელდა, რის საფუძველზეც, ჯამში 12000-მდე აპლიკანტი ჩაირიცხა და  სასურველი პროფესიის დასაუფლებლად 100%-იანი სახელმწიფო დაფინანსება მიიღო. ჩარიცხულთაგან 100-მდე პროფესიული სტუდენტი  სპეციალური საგანმანათლებლო საჭიროების  მქონე პირს წარმოადგენდა.