პრემიერ-მინისტრ ირაკლი ღარიბაშვილის ინიციატივით, მაღალი აკადემიური მოსწრების სტუდენტებს საჯარო უწყებაში სტაჟირების გავლის საშუალება ექნებათ.

პროგრამის შესახებ მთავრობის ადმინისტრაციის უფროსის მოადგილემ ნინო კობახიძემ და საჯარო სამსახურის ბიუროს ხელმძღვანელმა ეკა ქარდავამ ბრიფინგზე ისაუბრეს. მათი თქმით, სტაჟირების გავლა ბაკალავრიატის დამამთავრებელი კურსის იმ სტუდენტებს, მაგისტრანტებსა და დოქტორანტებს შეეძლებათ, რომელთა GPA მინიმუმ 3.0-ა, ხოლო GPA-ს სისტემის არარსებობის შემთხვევაში, საშუალო არითმეტიკული გამოთვლით, მინიმუმ (B) ძალიან კარგი (81-90%) აკადემიური მოსწრება აქვთ.

„შემუშავდა სტაჟირების ერთიანი სტანდარტი, რაც საჯარო სამსახურში ჯანსაღი კონკურენციის შექმნას და დასაქმების ხელმისაწვდომობას წაახალისებს. 
საჯარო უწყებებში სტაჟირების პროგრამა უნივერსიტეტებთან მჭიდრო თანამშრომლობით ხორციელდება. საქართველოს მთავრობის ადმინისტრაციას, საჯარო სამსახურის ბიუროსა და 28 აკრედიტებულ უნივერსიტეტს შორის პროგრამის ფარგლებში გაფორმდა ურთიერთთანამშრომლობის მემორანდუმი" - ვკითხულობთ მთავრობის ვებგვერდზე გამოქვეყნებულ განცხადებაში სტაჟირების შესახებ.

ეკა ქარდავას თქმით, სტუდენტები სტაჟირებას თავიანთი სპეციალობის შესაბამის სტრუქტურებში გაივლიან. 

სტაჟირების პროგრამაზე დარეგისტრირება 15-დან 25 სექტემბრამდე იქნება შესაძლებელი.