საქართველოს ყოფილი პრემიერ-მინისტრის, ბიძინა ივანიშვილის აზრით, პრეზიდენტი გიორგი მარგველაშვილი მთავრობას კონკურენტად განიხილავს და „უნდა მას ხელი შეუშალოს“. ამის შესახებ ივანიშვილი „კვირის პალიტრასთან“ ექსკლუზიურ ინტერვიუში საუბრობს.
„ინაუგურაციის მეორე თუ მესამე დღესვე, როცა სიტუაციის დალაგება დავიწყეთ, ჩვენი პოლემიკის ერთ-ერთი საგანი გახლდათ პრეზიდენტ მარგველაშვილის პოზიცია, რომ ის კონკურენციაში უნდა იყოს მთავრობასთან და პარლამენტთან. მე მას ვეუბნებოდი, რომ ეს პოზიცია არ არის სწორი, თქვენ უნდა მოხვიდეთ ერთ გუნდად, „ქართული ოცნების“ გუნდი გეხმარებოდა მთელი არჩევნების განმავლობაში, მხარს გიჭერდა, ჯერ არაკორექტულია და მეორეც, კონკურენცია დაგაზარალებთ. ხელი ხელს ჩაკიდეთ, ერთად უნდა იმუშაოთ და არ უნდა იყოს კონკურენცია. საბოლოოდ, მე ჩემს აზრზე დავრჩი, მას კი თავისი აზრი არ შეუცვლია. მის ყველა ქმედებაში განა მარტივი დასანახი არ არის, რომ, ეს სიტყვა არ მინდა ვიხმარო, მაგრამ კონკურენტს ებრძვის, კონკურენტთან აქვს საქმე და უნდა ხელი შეუშალოს. ამით, საბოლოო ჯამში, ქვეყანას ეშლება ხელი და ამას უნდა მიხვდეს პრეზიდენტი მარგველაშვილი", - აცხადებს ბიძინა ივანიშვილი.
„ის პრეზიდენტის სასახლეში შევიდა და გუნდის არც ერთ წევრს არ ჰკითხა მაშინ, როცა იცოდა მათი უარყოფითი განწყობა. ვეტოს დადება ძლივს გადაიფიქრა კანონპროექტზე, რომელიც წაკითხული არ ჰქონდა და პროკურატურას გრიფი მთელი თვე არ მოუხსნა. ეს საბოლოო ჯამში, რა თქმა უნდა, აზარალებს ქვეყანას", - აღნიშნავს ივანიშვილი.
