ფარულ ჩანაწერების საკითხზე მომუშავე კომისიის დღევანდელი სხდომის განხილვის მთავარი თემა კვლავ ე.წ. გასაღებთან დაკავშირებული საკითხია.
როგორც "საერთაშორისო გამჭვირვალობა - საქართველოს" ხელმძღვანელი ეკა გიგაური ამბობს, არასამთავრობო ორგანიზაციები კვლავ იმ პოზიციაზე რჩებიან, რომ ე.წ. გასაღები შინაგან საქმეთა სამინისტროდან მობილური ოპერატორების ხელში გადავიდეს.
"ჩვენი პოზიცია არ შეცვლილა. წლების განმავლობაში პრობლემა იყო ის, რომ ძალიან დიდი უფლებამოსილება და საშულებები ჰქონდა შინაგან საქმეთა სამინისტროს, როდესაც პირდაპირ წვდომას ახდენდა ჩვენს სატელეფონო საუბრებზე. ჩვენ დავინახეთ, რომ ამან არ გაამართლა, შესაბამისად ვფიქრობთ, რომ ახლა უნდა გამოვიყენოთ ევროპული მოდელი, სადაც გასაღები მობილური ოპერატორების ხელში არის", - განაცხადა გიგაურმა.
მან შსს-ს მიერ მობილური ოპერატორების სერვერებზე დაცული ინფორმაციის გამოყენების კონტროლის მექანიზმის დაწესებაზეც ისაუბრა.
"მობილურ ოპერატორებში სერვერებზე არის დაცული ინფორმაცია, მაგალითად, ვის დავურეკეთ, ვის გავუგზავნეთ სმს და ა.შ. ამ ინფორმაციასაც შსს იღებს კონტროლის გარეშე და ამისთვის სასამართლოს გადაწყვეტილებაც არ სჭირდება. აქედან გამომდინარე, ეს საკითხიც დასარეგულირებელია", - აღნიშნა გიგაურმა.
