კომერციულ მოსყიდვაში ბრალდებულ მსაჯებს აღმკვეთი ღონისძიების სახით პატიმრობა შეეფარდათ. პატიმრობასთან დაკავშირებით ბრალდების მხარის შუამდგომლობა თბილისის საქალაქო სასამართლოს მოსამართლე ბადრი შონიამ დააკმაყოფილა.

როგორც პროკურორმა თენგიზ ფხაკაძემ განაცხადა, ბრალდებულების მიმალვის, მოწმეებზე ზემოქმედებისა და მტკიცებულებების განადგურების საფრთხე არსებობს.

ბრალდებულებმა დანაშაული აღიარეს და განაცხადეს, რომ ჩადენილ დანაშაულს ინანიებენ. მათი განმარტებით, ამ დანაშაულის ჩადენა იმ მძიმე სოციალურ-ეკონომიკური პირობებით იყო გამოწვეული, რომელიც მსაჯებს აქვთ. მათივე ინფორმაციით, თამაშზე ისინი მხოლოდ 60 ლარს იღებენ, რაც სრულიად არ არის საკმარისი. 

შსს-ს ანტიკორუფციულმა სააგენტომ კომერციული მოსყიდვის ფაქტზე რვა პირი დააკავა. გამოძიებამ დაადგინა, რომ დაკავებული პირები 2500-დან 5000 აშშ დოლარამდე თანხის სანაცვლოდ წინასწარ ურიგდებოდნენ მოქალაქეებს მათი მსაჯობით გასამართ თამაშებში ფეხბურთელთა დასაჯარიმებელი ყვითელი და წითელი ბარათების რაოდენობაზე, რასაც ზედმიწევნით ზუსტად ასრულებდნენ. ბრალდებულები არიან: ოთარ ხეთაძე, ირაკლი ურუშაძე, მამუკა ურუშაძე, თეიმურაზ ხუჭუა, ალექსანდრე გუნთაძე, ზვიად ასკაროღლი, ონისე მოლოდინაშვილი და თორნიკე გვანცელაძე.

წინასასამართლო სხდომა მსაჯების საქმეზე 13 ნოემბერს, 11.00 საათზე ჩაინიშნა.