გადაუდებელი დახმარების მედიკამენტების სიას კიდევ ცხრა დაემატა. ჯანდაცვის მინისტრის შესაბამისი ბრძანება ძალაში დღეიდან შევიდა. 

გადაუდებელი დახმარების სამკურნალო საშუალებებს დაემატა: ამიოდარონი (ტაბლეტი)-ანტიარითმიული საშუალება, გლიბენკლამიდი (ტაბლეტი) - პერორალური ანტიდიაბეტური საშუალება, მეტფორმინი (ტაბლეტი) - პერორალური ანტიდიაბეტური საშუალება, კაპტოპრილის ტაბლეტები, ნებისმიერი დოზით - წნევის დამწევი საშუალება, ნიფედიპინის ტაბლეტები, ნებისმიერი დოზით - წნევის დამწევი საშუალება, მეტოპროლოლის ტაბლეტები, ნებისმიერი დოზით - წნევის დამწევი საშუალება, დექსამეტაზონის ტაბლეტები - ანაფილაქსიის საწინააღმდეგო საშუალება, პრედნიზოლონის ტაბლეტები - ანაფილაქსიური შოკის, ალერგიული რეაქციების სამკურნალო და ბრონქული ასთმის შეტევის კუპირების საშუალება და ფუროსემიდის ტაბლეტები - ძლიერი და სწრაფი მოქმედების შარდმდენი საშუალება. 

ფარმაცევტული დაწესებულება უფლებამოსილია, გადაუდებელი მდგომარეობის დროს, ურეცეპტოდ გასცეს წამლის ფორმა, ერთჯერადი დოზის ოდენობით. იმ შემთხვევაში, თუ შეუძლებელია ორიგინალური შეფუთვის დაშლა, ფარმაცევტული პროდუქტი გაიცემა 1 სტანდარტული შეფუთვის რაოდენობით.