ფრანც კაფკას „მეტამორფოზის“ ახალ სასცენო ვერსიაში მთავარ როლს იაპონური რობოტი ასრულებს. დადგმაში იგი ცენტრალურ ადგილს იკავებს, რამაც როლს მოწყურებულ მსახიობებს საფიქრალი უნდა გაუჩინოს - რობოტი თეატრშიც იკიდებს ფეხს.

ცნობილმა იაპონელმა რეჟისორმა ორიზა ჰირატამ რობოტების გამოჩენილ კონსტრუქტორ ჰიროში იშიგუროსთან ერთად მოქნილი რობოტი შექმნა, რომელსაც მეტალის ჩონჩხი და თეთრი, ადამიანის მსგავსი სახე და ხელები აქვს.

მსახიობი ირენ ჯეიკობი, რომელიც დადგმაში მთავარი გმირის ვაჟს თამაშობს, რობოტის სამსახიობო თვისებებს აღნიშნავს.

„არის მასში რაღაც ძალიან თეატრალური. მისი უნარი, გაიღიმოს ან იცინოს, თეატრალურ თეთრ ნიღაბს გაგონებს“, - ამბობს მსახიობი.

შოუ სახელწოდებით „მეტამორფოზის ანდროიდული ვერსია“, ფრანგულ ენაზეა და პრემიერა მიმდინარე კვირას, იოკოჰამაში გაიმართება. ნოემბერში კი თეატრალური დადგმა ნორმანდიის საშემოდგომო ფესტივალს გახსნის.

კაფკას „მეტამორფოზის“ მთავარი პერსონაჟი, კომივოიაჟერი გრეგორი ზამზა, ერთ დილას აღმოაჩენს, რომ გიგანტურ მწერად ქცეულა. რეჟისორმა უზარმაზარი ხოჭო რობოტით ჩაანაცვლა, რომელიც კაფკას ტექსტებს ავტომატურად კითხულობს.

მექანიკურ მსახიობებს თეატრში დიდი ხანია იყენებენ, პირველი შემთხვევა 1785 წელს ფრანგ გამომგონებელ ჟაკ დე ვოკანსონს ეკუთვნის. სიახლე ამ შემთხვევაში ისაა, რომ რობოტი მთავარ როლს ასრულებს.

კაფკას მოსაუბრე რობოტი საკვანძო მომენტია. მან შესაძლოა, ამერიკელი მსახიობის უილიამ კლოდ ფილდსის ცნობილი გამოთქმაც შეცვალოს: „ არასდროს იმუშაო ცხოველებთან, ბავშვებსა და... რობოტებთან“.