მოქალაქეთა საინიციატივო ჯგუფმა, სოფო კილასონიას ხელმძღვანელობით, კანცელარიის შენობასთან აქცია გამართა, სახელწოდებით „ქალების ხმა“. აქციის მონაწილეებმა ქალთა მიმართ ძალადობა და ქალთა მკვლელობებზე ხელისუფალთა შეფასებები გააპროტესტეს.
საპროტესტო აქციაზე შეკრებილებმა ხელისუფლების წარმომადგენლებისგან უფრო აქტიური და ქმედითუნარიანი პრევენციული ზომების მიღება მოითხოვეს.
„ჩვენ გვასწავლეს, რომ „უნდა ვიყოთ ჩუმად, იმიტომ, რომ ქალები ვართ"....
ჩვენ გვასწავლეს, რომ „უნდა მოვითმინოთ და ყურადღება არ მივაქციოთ წვრილმანებს, ქალები ვართ და სიბრძნე, მოთმინება გვმართებს"...
ჩვენ გვასწავლეს, რომ „უნდა ვიყოთ ჩუმად შვილების, ოჯახის, ქმრების, ტრადიციების, რწმენისა და მეზობლების აზრის გამო"...
ჩვენ შევეგუეთ „წესრიგს", რომელიც გვავალდებულებს, არ დავინახოთ და არ ვილაპარაკოთ.
და ახლა საკმარისია, რომელიმე ჩვენგანმა მცირედით დაარღვიოს ეს წესრიგი, მას კლავენ..." - ვკითხულობთ განცხადებაში, რომელიც მოქალაქეებს დღევანდელ აქციაში მონაწილეობისკენ მოუწოდებდა.
ფოტო: სოფო აფციაური
