სოფლის მეურნეობის მინისტრის მიერ ბიუჯეტის სახსრებით Iphone 6-ის შეძენის ფაქტს შრომის, ჯანმრთელობისა და სოციალური დაცვის მინისტრი დავით სერგეენკო გამოეხმაურა და თქვა, რომ „ეს არის სამსახურებრივი მოხმარების ტელეფონი და ამაში განსაკუთრებული არაფერია".

სერგეენკოს თქმით, ძალიან მნიშვნელოვანია ბიუჯეტის თანხის დაზოგვა, თუმცა „ყველაფერს აქვს საზღვარი".

სოფლის მეურნეობის სამინისტრო ოთარ დანელიასთვის 1 739 ლარად ღირებული Iphone 6-ის ბიუჯეტის სახსრებით ყიდვის ფაქტს ადასტურებს, თუმცა საფინანსო-ეკონომიკური დეპარტამენტის ხელმძღვანელი ოთარ შამუგია ამბობს, რომ ტელეფონი არის სახელმწიფოს საკუთრება და არა მინისტრის. „მინისტრი ამ ტელეფონით სარგებლობს, როდესაც მინისტრის ფუნქციას ასრულებს. გვქონდა საშუალება, მოქმედი კანონმდებლობის შესაბამისად გვეყიდა" - თქვა შამუგიამ.