თეთრიწყაროს მუნიციპალიტეტში სტიქიით დაზარალებულებმა დღეს მთავრობის ადმინისტრაციის შენობასთან ზარალის ანაზღაურების მოთხოვნით აქცია გამართეს.
„მინიმალურ დახმარებას ვითხოვთ, რომელსაც მუდმივად გვპირდებიან. ადგილობრივი გამგეობა, გვეუბნება, რომ ცოტაც უნდა მოვითმინოთ, თუმცა ასე უკვე 4 თვეა გრძელდება. მოსავალი სულ განადგურდა და ერთი დღის სამყოფი საკვებიც არ დაგვრჩა. დაგვპირდნენ, რომ ზარალს აგვინაზღაურებენ, მდგომარეობაც შეიწავლეს, მაგრამ დღემდე არავინ დაგვხმარებია. პრემიერ-მინისტრთან შესახვედრად მოვედით, თუმცა მასთან არ გვიშვებენ", - ამბობს აქციის მონაწილე დარიკო ხერგიანი.
„სოფელს ძალიან უჭირს. მეზობლისგან ზეთი ვისესხე და მხოლოდ ერთი ჭიქის მოცემა შეძლო. ასეთ მდგომარეობაში ცხოვრებაში არ ვყოფილვარ, არ მინდა ასე ცხოვრება", - უთხრა „ლიბერალს" აქციის ერთ-ერთმა მონაწილემ.
