20 ნოემბერი ტრანსგენდერთა ხსოვნის საერთაშორისო დღეა - თბილისში, იუსტიციის სახლის წინ არასამთავრობო ორგანიზაციების წამომადგენლებმა 11 ნოემბერს მოკლული საბი ბერიანის ხსოვნას პატივი მიაგეს.

 „ეს აქცია ეძღვნება იმ ადამიანების, ვისაც მოუსწრაფეს სიცოცხლე მათი გენდერული იდენტობის გამო, ვინც ვერ მიიღეს ისეთები, როგორებიც არიან, შესაბამისად, ჩვენ გვინდა მათ ხსოვნას პატივი მივაგოთ, რადგანაც ეს ადამიანები ჩვენთვის ღირებულნი არიან. ისინი, თავინთი სიცოცხლით მაგალითს აძლევენ სხვა ადამიანებს, რომ იყვნენ ისინი, ვინც არიან და არა ისინი, ვისი ხილვაც სურს საზოგადოებას“, - ამბობს „ლიბერალთან“ საუბრისას „ლგბტ საქართველოს" აღმასრულებელი დირექტორი დავით-მიხეილ შუბლაძე.

აქციის მონაწილეები ამბობენ, რომ საქართველოში ტრანსგენდერ მოქალაქეებს ექმნებათ ბარიერები და ვერ ახერხებენ პირადობის დამადასტურებელ მოწმობაში ეწეროთ ის გენდერი, რომელსაც თავს მიაკუთვნებენ.

„იუსტიციის სახლი იმიტომ, რომ აქ, ამ ადგილზე ტრანსგენდერი ადამიანები ადვილად უნდა იღებდნენ ცნობას იმის შესახებ, რომ ისინი მიეკუთვნებიან იმ სქესს, რომელშიც ისინი მთელი ცხოვრება ცხოვრობენ. მაგრამ, სამწუხაროდ, იუსტიციის სამინისტრო ამ ადამიანების უფლებებს პატივს არ სცემს და უსამართლოდ უშლის ხელს პირადობის მოწმობაში ეწეროთ სქესი, რომელსაც ისინი თავს მიაკუთვნებენ. ამის გამო ეს ადამიანები განსაკუთრებული სიძულვილისა და ჩაგვრის მსხვერპლნი ხდებიან, ვერ ცხოვრობენ, ისე, როგორც სხვა მოქალაქეები, მათ აქვთ ჩამორთმეული უფლება, იცხოვრონ იმ გენდერის აღიარებით, რომელსაც ისინი თავს მიაკუთვნებენ“, - უთხრა „ლიბერალს" „იდენტობის“ ხელმძღვანელმა ირაკლი ვაჭარაძემ.

ოფიციალური ვერსიით, 11 ნოემბერს, ღამით, ლევან კ-მ  პეკინის ქუჩაზე, დროებით საცხოვრებელ ბინაში, ურთიერთშელაპარაკებისას, დანით სხეულზე მრავლობითი ჭრილობები მიაყენა ნაცნობს, 1991 წელს დაბადებულ ბექა ბერიანს, რომელიც ადგილზე გარდაიცვალა. გამოძიების ინფორმაციით, ურთიერთშელაპარაკების მიზეზი თანხა იყო, რომელიც ბრალდებულმა ბექა ბ-ს რამდენიმე თვის წინ ასესხა და მის დაბრუნებას სთხოვდა.

„ლევან კ-მ დანაშაულის ჩადენის შემდეგ, კვალის დაფარვის მიზნით, ბექა ბერიანის დროებით საცხოვრებელ ბინაში ხანძარი გააჩინა და შემთხვევის ადგილიდან მიიმალა“, - ნათქვამია შსს-ს განცხადებაში. 

შსს-ს განცხადების თანახმად, სამართალდამცველებმა ლევან კ. მომხდარიდან მეორე დღეს დააკავეს: მკვლელობის იარაღი – დანა ნივთმტკიცებად ამოიღეს. დაკავებული აღიარებს დანაშაულს.

გამოძიება სისხლის სამართლის კოდექსის 108 მუხლით მიმდინარეობს, რაც განზრახ მკვლელობას გულისხმობს.