„დიდი ხნის განმავლობაში ღრმად მწამდა, რომ ქალისა და კაცის თანასწორობა ბუნებრივი პროცესია. დღევანდელი მდგომარეობით მივხვდი, რომ მეტი და აგრესიული ჩარევაა საჭირო, მათ შორის, საკანონმდებლო დონეზე“, - ამის შესახებ საქართველოს პარლამენტის თავმჯდომარემ, დავით უსუფაშვილმა გაეროს ქალთა ორგანიზაციის მიერ ორგანიზებულ ღონისძიებაზე განაცხადა.
„ახლა გეუბნებით მათ, ვისაც ადრე არ გეთანხმებოდით, საკანონმდებლო ჩარევის საჭიროებაზე - ახლა გეთანხმებით. ძალიან ბევრ გოგონას, რომელიც ძალადობის მსხვერპლია და ჩვენს შეკრებას ჩაფიქრებული უყურებს, ვპირდები, რომ შორს არ არის დრო, როცა ერთად დავასრულებთ ძალადობას“, - თქვა უსუფაშვილმა.
ღონისძიება გენდერული ძალადობის წინააღმდეგ 16-დღიანი გლობალური კამპანიის ფარგლებში ტარდება, რომელიც მთელს მსოფლიოში 25 ნოემბერს, ქალთა მიმართ ძალადობასთან ბრძოლის საერთაშორისო დღეს იწყება.
ღონისძიების პარალელურად, ახალი გლობალური კამპანია HeforShe გაიხსნა. ესაა კაცების სოლიდარობის მოძრაობა გენდერული თანასწორობისათვის.
მოძრაობის მხარდაჭერა ხელმოწერით ოფიციალურად გამოხატეს საქართველოს პარლამენტის თავმჯდომარემ, დავით უსუფაშვილმა, გაეროს განვითარების პროგრამის მუდმივმა წარმომადგენელმა საქართველოში ნილს სკოტმა, აშშ-ის ელჩმა საქართველოში რიჩარდ ნორლანდმა, საქართველოში ევროკავშირის წარმომადგენლობის ხელმძღვანელმა იანუშ ჰერმანმა, საქართველოს რაგბის კავშირის პრეზიდენტმა, გიორგი ნიჟარაძემ და საქართველოს ფეხბურთის ფედერაციის გენერალურმა მდივანმა, რევაზ არველაძემ.
