„მინდა, მივესალმო პარლამენტის უმრავლესობის სახელმწიფოებრივად სწორ და გონივრულ გადაწყვეტილებას“, - ასე გამოეხმაურა საქართველოს პრემიერ-მინისტრი ირაკლი ღარიბაშვილი ფარული მოსმენების შესახებ ბესელია-სესიაშვილი-ფოფხაძის საკანონმდებლო პაკეტის პირველი მოსმენით მიღებას.

პრემიერის აზრით, ეს, მართლაც, ოპტიმალური ვარიანტია, რომელიც საკანონმდებლო ორგანომ შეიმუშავა.

„იმედია, ამ საკითხს ერთხელ და სამუდამოდ დაესმება წერტილი“, - განაცხადა პრემიერ-მინისტრმა მთავრობის სხდომაზე.

„ჩემთვის, მართლაც, გასაოცარია ის რეაქცია, რაც აქვთ ჩვენს ე.წ. ოპონენტებს. მართლაც, 9 წლის განმავლობაში ჩვენი მოსახლეობა ითმენდა ამ უსამართლობას და ამას ერთხელ და სამუდამოდ წერტილი დაესვა“, - ამბობს ღარიბაშვილი.

გუშინ პარლამენტმა ფარული მოსმენის შესახებ ეკა ბესელიას, ირაკლი სესიაშვილისა და გედევან ფოფხაძის საკანონმდებლო პაკეტის პირველი კანონპროექტი - საქართველოს კანონის პროექტი „პერსონალურ მონაცემთა დაცვის შესახებ საქართველოს კანონში ცვლილების შეტანის თაობაზე“ პირველი მოსმენით, 75 ხმით,  58-ის წინააღმდეგ დაამტკიცა. დაახლოებით, ასეთივე მხარდაჭერა ჰქონდა პაკეტში შეტანილ სხვა კანონპროექტებს.

ბესელია-ფოფხაძე-სესიაშვილის საკანონმდებლო პაკეტის თანახმად, ე.წ. გასაღები შინაგან საქმეთა სამინისტროს ექნება.

ვახტანგ ხმალაძის საკანონმდებლო პაკეტი კი, რომელიც ე.წ. გასაღების კომუნიკაციების ეროვნული კომისიისთვის გადაცემას ითვალისწინებს, პარლამენტმა ჩააგდო. პაკეტში შეტანილ პირველ კანონპროექტს ხმა 61-მა დეპუტატმა მისცა, 71 წინააღმდეგ წავიდა.