კულტურული მემკვიდრეობის დაცვის ეროვნულ სააგენტოსთან საყდრისზე მასშტაბური სამუშაოების ჩატარებასთან დაკავშირებით მიმდინარე საპროტესტო აქციაზე ინციდენტი მოხდა. „ლიბერალის" კორესპონდენტის ინფორმაციით, სააგენტოდან ცოტა ხნის წინ გამოვიდა პირი, აქციის მონაწილეების მისამართით შეიგინა და შეურაცხმყოფელი ჟესტი აჩვენა.
ფაქტმა აქციის მონაწილეების აგრესია გამოიწვია. ისინი იმ ავტომანქანას შემოეხვივნენ, სადაც პირი იმყოფებოდა, ტერიტორიის დატოვების საშუალებას არ აძლევდნენ და ადგილზე მყოფი საპატრულო პოლიციისგან პირის დაკავებას ითხოვენ, მათი შეურაცხყოფისთვის.
რამდენიმე წუთის წინ, საპატრულო პოლიციამ სააგენტოდან გამოსული პირი და აქციის ერთ-ერთი მონაწილე მოწმის სტატუსით დასაკითხად გადაიყვანა. ისინი განცხადებების დაწერის შემდეგ გაათავისუფლეს.
აქციის მონაწილეების თქმით, პირი კულტურული მემკვიდრეობის დაცვის ეროვნული სააგენტოს თანამშრომელია, თუმცა ეს ვერსია ოფიციალურად ჯერ არ დასტურდება.
