გორის რაიონის სოფელ წითელუბნიდან ერთი ადამიანი გაიტაცეს.
ე.წ. მესაზღვრეებმა, სოფელ წითელუბნის განაპირას, 19 წლის ვასილ ხიდაშელი დააკავეს და ოკუპირებულ ტერიტორიაზე გადაიყვანეს. თანასოფლელების განცხადებით, ხიდაშელი სოფლის განაპირას პირუტყვს მწყემსავდა და ე.წ. საზღვარი არ გადაუკვეთავს.
დაკავებულის ადგილსამყოფელი ჯერჯერობით დაუზუსტებელია. ოჯახის წევრებმა მისი გატაცების ამბავი მეორე მენახირისგან შეიტყვეს, რომელმაც გაქცევა მოახერხა. გატაცებულის ოჯახს ჯერჯერობით არავინ დაკავშირებია.
როგორც ადგილობრივები ამბობენ, მიმდინარე წლის ზაფხულში ამავე ტერიტორიაზე ვასილ ხიდაშელის მამაც იყო დაკავებული და იგი ცხინვალის მილიციის იზოლატორში რამდენიმედღიანი პატიმრობის შემდეგ, 2000 რუბლის ოდენობის ჯარიმის გადახდის საფუძველზე გაანთავისუფლეს. ოჯახის წევრები ამბობენ, რომ ისინი ამჯერად თანხის გადახდას ვერ შეძლებენ და სახელმწიფოს დახმარებას სთხოვენ.
