სუპერმარკეტის თანამშრომელს, რომელმაც საფრანგეთში შეიარაღებული ისლამისტების თავდასხმის დროს იქ მყოფი მოქალაქეები დამალა, საფრანგეთის მოქალაქეობა მიანიჭეს.

24 წლის მუსლიმი ლასანა ბათილი, რომელიც წარმოშობით მალიდანაა, სუპერმარკეტის საწყობში იმყოფებოდა, როდესაც თავდამსხმელები მაღაზიაში შეიჭრნენ და 4 ადამიანი მოკლეს. ბათილიმ მოქალაქეები საწყობში შეიყვანა და იქ მალავდა.

„ხალხი გმირს მეძახის, თუმცა მე გმირი არ ვარ. მე ლასანა ვარ. მე იგივე ვარ. ახლაც იმავეს გავაკეთებდი, რადგან საკუთარი გულისკარნახით ვმოქმედებდი“, - თქვა ბათილიმ ცერემონიაზე, რომელსაც საფრანგეთის პრემიერ-მინისტრი და მინისტრები ესწრებოდნენ.

ლასანა ბათლი საფრანგეთში ბოლო 9 წლის განმავლობაში ცხოვრობდა, მოქალაქეობაზე მოთხოვნა კი გასულ წელს შეიტანა.