„სახელმწიფომ პოლიციელთა დაპატიმრებით მიიღო პოლიტიკური პატიმრები, რომელთა რეპრესიებიც პოლიტიკოსთა მხრიდან ადრევე იყო დაანონსებული“, - სამართალდამცავთა დაცვის ლიგა განცხადებას ავრცელებს, სადაც წერია, რომ „დღეს პოლიციის ღირსეული ოფიცრები დააკავეს“.
საუბარია დღეს გავრცელებულ ცნობაზე ირაკლი ფირცხალავასა და რამდენიმე სხვა ოფიცრის დაკავების შესახებ, რომლებიც, გავრცელებული ინფორმაციით, ე.წ. „კორტების საქმესთან“ არიან კავშირში.
„სახელმწიფოს პოლიციელთა რეპრესიებით იური ვაზაგაშვილის ტრაგიკული მკვლელობით გამოწვეული საზოგადოების სამართლიანი აღშფოთების ჩაცხრობა და გადაფარვა სურს. პოლიციელთა დაპატიმრებებით სახელმწიფო საკუთარი უსუსურობის დაფარვას ცდილობს. სახელმწიფოსა და პროკურატურის უმაღლესმა მოხელეებმა „კორტების“ სპეცოპერაცია მკვლელობად გამოაცხადეს, როცა გამოძიებაში პროკურატურა, მკვლელობის ვერსიას არც კი განიხილავს.
პროკურატურას პოლიტიკოსებმა წინმსწრებად გამოუცხადეს სამუშაო ვერსია, დაუდგინეს პოლიციელთა დაპატიმრების ვადები, რომლებიც დამნაშავეთა სამყაროშიც და პროკურატურისთვისაც სიმბოლურია. საქმე იქამდეც მივიდა, რომ პროკურატურას დასაპატიმრებელ პოლიციელთა სახელები და გვარებიც დაუსახელეს. ერთ-ერთმა ქალბატონმა დეპუტატმა, სოციალურ ქსელში სინანულიც კი გამოხატა, საქართველოში სიკვდილით დასჯის გაუქმების გამო.
ზეწოლით, დაშინებითა და მუქარით, ხელოვნურად შეკოწიწებული „მტკიცებულებებით“, პროკურატურა ცდილობს, „გახსნას“ „კორტების“ სპეცოპერაციის საქმე და საზოგადოება შეცდომაში შეიყვანოს. სასამართლო პროცესზე ფარდა აეხდება იმ ფარსს, რომელიც პროკურატურამ დადგა“, - ნათქვამია განცხადებაში.
