„კორტების საქმეზე“ ბრალდებულებს აღკვეთის ღონისძიების სახით პატიმრობა შეეფარდათ. გადაწყვეტილება მოსამართლემ რამდენიმე წუთის წინ გამოაცხადა.

დღეს თბილისის საქალაქო სასამართლო ე.წ. კორტების სპეცოპერაციის საქმეზე ბრალდებულთა მიმართ აღკვეთის ღონისძიების შეფარდების საკითხზე მსჯელობდა.

ე.წ. კორტების სპეცოპერაციის საქმეზე ბრალდებულების აღკვეთის ღონისძიებასთან დაკავშირებულ პროცესს მოსამართლე გიორგი გოგნიაშვილი უძღვებოდა. ადვოკატებმა დაკავებული 11 პირისთვის გირაო მოითხოვეს, სხვადასხვა ოდენობის თანხით. ირაკლი ფირცხალავასა და გიორგი ცააძის ადვოკატებმა მათი დაცვის ქვეშ მყოფებისთვის 10 ათასლარიანი გირაოთი გათავისუფლების შუამდგომლობა დააყენეს. ყოფილი გამომძიებლის, მერაბ ბეროძის ადვოკატმა მატერიალური მდგომარეობის გათვალისწინებით, მოსამართლეს მიმართა შუამდგომლობით, რომ მისი დაცვის ქვეშ მყოფი 2 ათასლარიანი გირაოს სანაცვლოდ გაეთავისუფლებინა. 

დაკავებულები არიან: შსს ცენტრალური კრიმინალური პოლიციის დეპარტამენტის დირექტორის ყოფილი მოადგილე ირაკლი ფირცხალავა; შსს ცენტრალური კრიმინალური პოლიციის დეპარტამენტის სამძებროს სამმართველოს უფროსის ყოფილი მოადგილე გიორგი ცააძე; შსს კრიმინალური პოლიციის დეპარტამენტის ყოფილი გამომძიებელი ლევან ბეროძე; შსს ქ.თბილისის შს მთავარი სამმართველოს სპეცდანიშნულების ჯგუფის ყოფილი უფროსი კახაბერ ნაკანი და მისი ყოფილი მოადგილე გიორგი გულბიანი; სპეცდანიშნულების ჯგუფის წევრები: იასონ მილაძე, ალექსანდრე ციმაკურიძე, ზურაბ ჯოხაძე, დავით ალელიშვილი, სოსო ჩაკვეტაია და ალექსანდრე სანიკიძე.

2006 წლის 2 მაისის სპეცოპერაციის დროს ზურაბ ვაზაგაშვილისა და ალექსანდრე ხუბულოვის მკვლელობის საქმეზე კრიმინალური პოლიციის უფროსის ყოფილი მოადგილე ირაკლი ფირცხალავა და კიდევ 10 პირია დაკავებული. ერთს კი ბრალი დაუსწრებლად წარედგინა.