„აღკვეთის ღონისძიების გასაჩივრება ჯერ არ გადაგვიწყვეტია, მაგრამ, ალბათ, არ გავასაჩივრებთ“, - „კორტების საქმეზე“ დაცვის მხარის ადვოკატი დავით ხაჟალია ამბობს, რომ მათთვის უცნობია, რატომ მიიჩნია მოსამართლემ პატიმრობის შეფარდება აუცილებლად, რადგან მათ გადაწყვეტილების სამოტივაციო ნაწილი ჯერ არ ჩაბარებიათ.

„სასამართლო დარბაზის გარეთ მიმდინარე ხმაურის საპირისპიროდ პროცესმა მშვიდად ჩაიარა. ჩვენ სასამართლოს ჩვენი არგუმენტები მივაწოდეთ, რომ აღკვეთის ღონისძიების სახით დაპატიმრების გამოყენების საფუძველი არ არსებობდა, არც ერთ ბრალდებულს არ ჰქონია მცდელობაც კი, ხელი შეეშალა გამოძიებისთვის, ან მიმალულიყო. თუმცა მოსამართლემ გადაწყვიტა ის, რაც გადაწყვიტა“, - უთხრა „ლიბერალს“ ხაჟალიამ.

დღეს თბილისის საქალაქო სასამართლო ე.წ. კორტების სპეცოპერაციის საქმეზე ბრალდებულთა მიმართ აღკვეთის ღონისძიების შეფარდების საკითხზე მსჯელობდა.

ე.წ. კორტების სპეცოპერაციის საქმეზე ბრალდებულების აღკვეთის ღონისძიებასთან დაკავშირებულ პროცესს მოსამართლე გიორგი გოგნიაშვილი უძღვებოდა. ადვოკატებმა დაკავებული 11 პირისთვის გირაო მოითხოვეს, სხვადასხვა ოდენობის თანხით, თუმცა ბრალდებულებს აღკვეთის ღონისძიების სახით პატიმრობა შეეფარდათ. გადაწყვეტილება მოსამართლე გიორგი გოგნიაშვილმა მიიღო.