„ყოფილმა მასწავლებელმა სასამართლოს მიმართა და ეს არის ზუსტად ის ადგილი, სადაც ამის შესახებ გადაწყვეტილება უნდა მიიღონ“, - განაცხადა განათლებისა და მეცნიერების მინისტრმა, თამარ სანიკიძემ დეკრეტში მყოფი პედაგოგის სამსახურიდან გათავისუფლების შესახებ.
სანიკიძის თქმით, სახელშეკრულებო პირობებზე პასუხისმგებლები ხელშეკრულების მხარეები არიან.
თბილისის 115-ე საჯარო სკოლიდან გათავისუფლებული პედაგოგის შესახებ ინფორმაცია ომბუდსმენის აპარატმა გაავრცელა. ომბუდსმენის აპარატმა რეკომენდაციით მიმართა თბილისის 115-ე საჯაროს სკოლის დირექტორს, შეისწავლოს ორსულობის, მშობიარობისა და ბავშვის მოვლის გამო, შვებულებაში მყოფი ქალბატონის სამსახურიდან გათავისუფლების საქმე და დარღვეული შრომითი უფლებები აღადგინოს.
„ლიბერალი“ 115-ე საჯარო სკოლას დაუკავშირდა, თუმცა მათ ამ საკითხის შესახებ კომენტარი არ ისურვეს.
