„პოლიციელებისთვის მიცემული გვაქვს მითითება, რომ გამოძიებამ შემაკავებელი ორდერის გაცემას ხელი არ შეუშალოს“, - ამის შესახებ შსს-ს იურიდიული დეპარტამენტის უფროსმა, ზვიად ოქროპირიძემ პარლამენტის ადამიანის უფლებათა დაცვის კომიტეტის სხდომაზე განაცხადა.

ოქროპირიძის თქმით, 2014 წელს ოჯახში ძალადობის  636  შემთხვევა დაფიქსირდა, რომელიც 126-ე პრიმა მუხლით (ოჯახში ძალადობა) არის გათვალისწინებული.

შარშან ოჯახური ძალადობის მიმართულებით 1000-მდე პოლიციელი გადამზადდა. ამ მიმართულებით სპეციალიზებული დანაყოფის შექმნა არ იგეგმება.

„ჩვენ უფრო მეტი პოლიციელი გვყავს ამ პროცესში ჩართული, ვიდრე ეს ერთი დანაყოფის ფარგლებში იქნებოდა შესაძლებელი“, - ამბობს ზვიად ოქროპირიძე.

შსს თებერვალში სტატისტიკური მონაცემების შემუშავების პროგრამის პრეზენტაციას გეგმავს. როგორც ოქროპირიძე ამბობს, ძველი მეთოდი შეიცვლება.

პარლამენტის ადამიანის უფლებათა დაცვის კომიტეტის სხდომაზე „2013 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ საქართველოს სახალხო დამცველის ანგარიშზე“ საქართველოს პარლამენტის 2014 წლის 1 აგვისტოს დადგენილებით მიღებული რეკომენდაციების შესრულების თაობაზე პროკურატურისა და შსს-ს ანგარიშს ისმენენ.