„ადამიანის უფლებების სწავლებისა და მონიტორინგის ცენტრი“ (EMC) შსს-ს მოუწოდებს, სოფელ მოხეში პოლიციის ახალი განყოფილების ხელმძღვანელად გელა კოხოძის დანიშვნის შესახებ გადაწყვეტილება გადასინჯოს, რადგან ორგანიზაციის თქმით, ეს უკანასკნელი მუსლიმების მიმართ დისკრიმინაციულ დამოკიდებულებაში არაერთხელაა შემჩნეული.
„2012 წლის ოქტომბრის არჩევნების შემდეგ, გელა კოხოძე ადიგენის რაიონის პოლიციის უფროსი გახდა. 2014 წლის დასაწყისში ის დააქვეითეს და აბასთუმნის პოლიციის სამმართველოში დეტექტივის პოზიციაზე გადაიყვანეს. როგორც EMC-ისთვის არის ცნობილი, დღეის მდგომარეობით, გელა კოხოძე სოფელ მოხის პოლიციის ახალ განყოფილებას უხელმძღვანელებს“ - ვკითხულობთ EMC-ის განცხადებაში.
2014 წლის 22 ოქტომბერს ადიგენის რაიონის სოფელ მოხეში ადგილობრივმა ხელისუფლებამ სადავო შენობის ადგილას კულტურის სახლის სამშენებლო სამუშაოები დაიწყო, რასაც პოლიციასა და მუსლიმებს შორის დაპირისპირება მოჰყვა. დააკავეს რამდენიმე მუსლიმი.
„მოწმეებისგან აღებული ახსნა-განმარტებები აჩვენებს, რომ მუსლიმი თემის წევრების უკანონო დაკავებისა და ცემის ინციდენტებში მონაწილეობას უშუალოდ გელა კოხოძეც იღებდა. მისი სახელი და გვარი სამცხე-ჯავახეთის პროკურატურის საგამოძიებო ნაწილში მიმდინარე გამოძიების ფარგლებში დაკითხული მოწმეების ჩვენებებშიც გამოიკვეთა. გელა კოხოძე ფიგურირებს 2013 წელს სოფელ ჭელაში მინარეთის დემონტაჟისას ჩატარებული საპოლიციო ოპერაციაში, რომლის დროსაც დაფიქსირდა პოლიციის მხრიდან მუსლიმი თემის წევრების უკანონო დაკავებისა და ცემის ფაქტები" - ნათქვამია EMC-ის განცხადებაში.
ორგანიზაციას მიაჩნია, რომ აღნიშნული მიზეზების გამო, გელა კოხოძის სოფელ მოხეს პოლიციის უფროსად დანიშვნა გაუმართლებელია, რადგან ეს ფაქტი პოლიციის მიერ რეპრესიული პოლიტიკის ლეგიტიმაციას წარმოადგენს.
