მერიის ზედამხედველობის სამსახურის აპარატის ყოფილი უფროსი ჯოკია ბოდოკია წარდგენილ ბრალდებას არ აღიარებს და აცხადებს, რომ ქრთამი არ აუღია - ამის შესახებ ჯოკია ბოდოკის ადვოკატმა გიორგი ყავლაშვილი „ლიბერალთან“ საუბრისას განაცხადა.
ადვოკატის თქმით, ბოდოკიას ბრალი ოფიციალურად წარედგინა. ყავლაშვილის ინფორმაციით, საბრალდებო დასკვნაში ნახსენებია კერძო კომპანია „დარიოუში“ (DARYOUSH) და ნათქვამია, რომ ჯოკია ბოდოკიამ ამ კომპანიის წარმომადგენელს სასტუმროს მშენებლობის ნებართვის გაცემისა და მფარველობის სანაცვლოდ ქრთამის სახით სასტუმროს მშენებლობის ღირებულების 10% – 180 000 აშშ დოლარი მოსთხოვა, საიდანაც წინასწარ ქრთამის სახით 50 000 აშშ დოლარი აიღო.
რაც შეეხება ბრალდებულის პოზიციას, ადვოკატმა აღნიშნა, რომ მისი დაცვის ქვეშ მყოფი დუმილის უფლებას იყენებს, თუმცა ამასთან კატეგორიულად არ ეთანხმება ბრალდების ფორმულირებას.
შინაგან საქმეთა სამინისტროს ანტიკორუფციული სააგენტოს ოპერატიულ-სამძებრო და საგამოძიებო მოქმედებების შედეგად, განსაკუთრებით დიდი ოდენობით ქრთამის აღების ფაქტზე, ქალაქ თბილისის მერიის ზედამხედველობის სამსახურის აპარატის უფროსი ჯოკია ბოდოკია დააკავეს.
გამოძიება საქართველოს სისხლის სამართლის კოდექსის 338-ე მუხლის მე-3 ნაწილის „ე“ ქვეპუნქტით მიმდინარეობს, რაც განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.
ადვოკატის თქმით, თბილისის საქალაქო სასამართლო ჯოკია ბოდოკიასთვის აღკვეთის ღონისძიების შეფარდების საკითხზე, სავარაუდოდ, დღეს იმსჯელებს.
