უკრაინის პრეზიდენტის პეტრო პოროშენკოს ბრძანებულებით, საკონსულტაციო ორგანო, რეფორმების საკითხში მრჩეველთა საერთაშორისო საბჭო შეიქმნა. საბჭოს მთავარი ამოცანა უკრაინაში რეფორმებისთვის რეკომენდაციების შემუშავებაა. საბჭოს საქართველოს ექსპრეზიდენტი მიხეილ სააკაშვილი უხელმძღვანელებს.
"ჩვენ დიდხანს ვიფიქრეთ, როგორ გამოგვეყენებინა მიხეილ სააკაშვილის ცოდნა, გამოცდილება და უნიკალური ნოუ-ჰაუ. საქართველოში სააკაშვილმა პრაქტიკულად ყველა სფეროს რეფორმირება შეძლო", - მიიჩნევს პეტრო პოროშენკო.
როგორც პოროშენკო აღნიშნავს, სააკაშვილი გახდება უკრაინის წარმომადგენელი ქვეყნის ფარგლებს გარეთ და ამავდროულად იგი იქნება საერთაშორისო საზოგადოების წარმომადგენელი უკრაინაში. "ჩვენ დარწმუნებულები ვართ, რომ სწორედ ის შეძლებს ორმხრივი კომუნიკაციის დამყარებას მსოფლიოსა და უკრაინას შორის რეფორმების საკითხებში - მოიზიდავს საუკეთესო უცხოურ გამოცდილებას და ღირსეულად წარადგენს ჩვენს მუშაობას საზღვარგარეთ", - აღნიშნავს პოროშენკო.
მიხეილ სააკაშვილის Facebook-ზე გამოქვეყნებული ცნობის თანახმად, ახალ პოზიციაზე მუშაობისთვის მიხეილ სააკაშვილს უკრაინის მოქალაქეობის მიღება არ სჭირდება. სააკაშვილი საქართველოს მოქალაქედ რჩება.
