იუსტიციის უმაღლესი საბჭოს არამოსამართლე წევრი ევა გოცირიძე თბილისის საქალაქო სასამართლოდან სისხლის სამართლის კოლეგიის გამოყოფის ინიციატივით გამოდის.
პარლამენტის ადამიანის უფლებათა დაცვის კომიტეტის სხდომაზე "2013 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ“ სახალხო დამცველის ანგარიშის რეკომენდაციების შესრულების თაობაზე იუსტიციის უმაღლესი საბჭოს ანგარიშს უსმენენ.
თბილისის საქალაქო სასამართლოს შესახებ საუბრისას გოცირიძემ განსაკუთრებით მოსამართლეთა სიმცირის პრობლემა გამოყო.
„მოსამართლეებს არ გააჩნით პირადი ცხოვრება, შაბათ-კვირა. მათი გადაწყვეტილებების ხარისხი ეცემა. თუმცა გამოსავალი 18 ახალი მოსამართლის დამატება არაა. აქ უკვე დარბაზების ნაკლებობის პრობლემა, ასევე სირთულეს წარმოადგენს მოსამართლეთა თანაშემწეების დამატების საკითხი“, - ამბობს გოცირიძე.
