„ინფრასტრუქტურის რეაბილიტაციის ფარგლებში 2014 წელს პანდუსების მოწყობა-რეაბილიტაცია 88 სკოლაში მოხდა“, - განათლების მინისტრის მოადგილე ლია გიგაური ომბუდსმენის რეკომენდაციების შესრულების შესახებ ადამიანის უფლებათა დაცვის კომიტეტის სხდომაზე სამინისტროს ანგარიშს წარადგენს.
გიგაურის თქმით, სკოლებში სპეციალური საგანმანათლებლო საჭიროებების მქონე ბავშვებისთვის დაფინანსება იზრდება. სსსმ ყველა მოსწავლეს ჰყავს სპეციალური მასწავლებელი. გიგაური აღნიშნავს, რომ ამ დროისათვის 4000-მდე მოსწავლეა შეფასებული და ყველა მიმართვა დაკმაყოფილდება.
„ასაშენებელ სკოლათა პროექტებში გათვალისწინებულია შშმ ბავშვთა საჭიროებები. შესაძლოა, სკოლებს პანდუსების დასამონტაჟებლად სახსრებიც გამოეყოს. შშმ პირთათვის ადაპტირებული სანიტარული კვანძები უკვე მოეწყო 43 საჯარო სკოლაში“, - ამბობს მინისტრის მოადგილე.
რაც შეეხება მაღალმთიან სოფლებს, ლია გიგაური აღნიშნავს, რომ მათ არ აქვთ სახსრების პრობლემა და „დაფინანსება გაცილებით აღემატება მათ საჭიროებებს“.
