„საქართველოს გაერთიანებული წყალმომარაგების კომპანიაში" 2013-2014 წლებში დიდი ოდენობით თანხის მითვისების ფაქტზე კომპანიის ფინანსური დეპარტამენტის ყოფილი უფროსი, ძებნილი თამარ ფხოველიშვილი დააკავეს, - ამის შესახებ განცხადებას შსს ავრცელებს.

როგორც განცხადებაშია ნათქვამი, ამავე საქმეზე დაკავებულია შპს „საქართველოს გაერთიანებული წყალმომარაგების კომპანიის“ ფულადი სახსრებისა და საკრედიტო რესურსების სამმართველოს ყოფილი უფროსი ნათია ნავროზაშვილი, რომელმაც თამარ ფხოველიშვილსა და მის მეუღლე ზურაბ ნუცუბიძესთან ერთად  კომპანიის კუთვნილი თანხა მიითვისა.

დაკავებულების მიმართ გამოძიება სისხლის სამართლის კოდექსის  182-ე მუხლის მე-2 ნაწილის „დ“ ქვეპუნქტით და ამავე მუხლის მე-3 ნაწილის „ა“ და „ბ“ ქვეპუნქტებით მიმდინარეობს, რაც სასჯელის სახით 7-დან 11 წლამდე ვადით თავისუფლების აღკვეთას ითვალისწინებს.