„დღეს ხელისუფლება და პარლამენტი ორიენტირებული უნდა იყოს ბიზნესზე და უნდა შექმნას მისი ხელშემწყობი რეგულაციები, რასაც, სამწუხაროდ, დღეს ვერ ვხედავთ“, - განაცხადა საქართველოს ბიზნესასოციაციის თავმჯდომარემ, გიორგი ჭირაქაძემ.
ჭირაქაძის თქმით, ლარის კურსთან მიმართებით დღეს პანიკური ვითარებაა და აუცილებელია ხელისუფლების მხრიდან სწრაფი და ქმედითი ნაბიჯები.
„მიმაჩნია, ხელისუფლებას ბევრი რეზერვი აქვს არსებული ვითარების გამოსასწორებლად. ძირითადად ეს რესურსებია პრივატიზაცია, ბიზნესზე უარყოფითად მოქმედი რამდენიმე საკანონმდებლო რეგულაციის გაუქმება და მასზე ორიენტირებული ისეთი ინიციატივების შექმნა, რომელიც ბიზნესის სფეროს წაახალისებს“, - განაცხადა ჭირაქაძემ.
მისივე თქმით, ეკონომიკის სამინისტროს მიერ წარმოდგენილი ობიექტების პრივატიზაცია ლარის კურსს დროებით დაარეგულირებს, ხელისუფლების მხრიდან ქმედითი ნაბიჯები კი შესაძლებელს გახდის ლარის კურსთან არსებული კითხვების მნიშვნელოვნად შემცირებას.
