სურსათის ეროვნული სააგენტო აფრთხილებს მოსახლეობას, არ მიირთვას შპს „რაჭის", შპს „გიოს", შპს „პროგრესი ალვანისა" და შპს „პინოს" მიერ წარმოებული გაყინული ხინკალი და პელმენი, რადგან, სააგენტოს განცხადებით, მათში აღმოჩენილია პათოგენური მიკროორგანიზმი „ლისტერია მონოციტოგენეზი", რომელიც საფრთხეს უქმნის ადამიანის, განსაკუთრებით კი ბავშვებისა და ორსული ქალების სიცოცხლესა და ჯანმრთელობას.
„შპს „პინოს" მიერ წარმოებულ პელმენში აღმოჩენილია ასევე სალმონელა, რომელიც საკვებისმიერი ინფექციური დაავადების - სალმონელოზის გამომწვევია და ადამიანს სურსათითა და წყლით გადაეცემა; ხასიათდება მრავალფეროვანი კლინიკური გამოვლინებით. სალმონელოზი მიმდინარეობს უპირატესად საჭმლის მომნელებელი ორგანოების დაზიანებით; ახასიათებს გულისრევა, ღებინება, საერთო სისუსტე, ტკივილი მუცლის არეში, შემცივნება, ტემპერატურის მომატება."
შპს „რაჭას", შპს „გიოს", შპს „პროგრესი ალვანსა" და შპს „პინოს"არაგეგმური ინსპექტირების შედეგად საწარმოო პროცესი შეუჩერდათ და ბიზნესოპერატორები 1000-1000 ლარით დაჯარიმდნენ. კანონმდებლობის შესაბამისად, მათ დაევალათ, უმოკლეს ვადაში გაითხოვონ ბაზრიდან ყველა დასახელებისა და პარტიის სურსათი" - ნათქვამია სურსათის ეროვნული სააგენტოს განცხადებაში.
