ბათუმის საერთაშორისო საფეხბურთო სტადიონს ესპანური კომპანია „iberproex engineering & project management” ააშენებს, - ინფორმაციას ამის შესახებ აჭარის ფინანსთა და ეკონომიკის სამინისტრო ავრცელებს.

მათი ინფორმაციით, 22-წევრიანმა სპეციალურმა კომისიამ საუკეთესო 11 პროექტიდან შეარჩია. პროექტის მიხედვით, სტადიონის ტერიტორიაზე ფრენბურთის მოედანი, სარეკრეაციო ტერიტორია, რესტორნები, მაღაზიები, სავაჭრო ობიექტები და საინფორმაციო ცენტრები განთავსდება. სტადიონის ავტოსადგომი 2000 მანქანას დაიტევს.

სტადიონის ფორმა, კერძოდ, ტალღოვანი ზოლები, ხვეულებით, მდინარე ჭოროხის შესართავს და შავი ზღვის ტალღებს ასახავს. 

„ერთი კონკრეტული პროექტის შერჩევა ძალიან დიდი პასუხისმგებლობა იყო. გამარჯვებული პროექტი დარწმუნებული ვარ სპორტის გულშემატკივართა მოწონებას დაიმსახურებს და ბათუმის საფეხბურთო სტადიონი ქალაქის ერთ-ერთი სავიზიტო ბარათი გახდება. 

სტადიონი სამომავლოდ არაერთ საერთაშორისო შეჯიბრებას უმასპინძლებს, რაც რეგიონში არა მხოლოდ სპორტის, არამედ ტურიზმის სექტორსაც გააძლიერებს“ - განაცხადა დავით ბალაძემ.

სამინისტროს ინფორმაციით, სტადიონის საბოლოო პროექტი 5 თვეში იქნება მზად, რის შემდეგაც მშენებლობაზე ტენდერი გამოცხადდება. სტადიონის მშენებლობა მიმდინარე წელს დაიწყება.