ჩვეულებრივი წაბლი (4 ინდივიდი), ძელქვა (7 ინდივიდი) და კოლხური ბზა (0,006 მ 3 ), წითელი ნუსხის ამ მცენარეებს მთავრობის განკარგულების საფუძველზე, ხარაგაულის მუნიციპალიტეტის ტერიტორიაზე მოჭრიან.

დოკუმენტის მიხედვით, ხეების მოჭრის უფლება „საქართველოს რკინიგზამ“ სარკინიგზო მაგისტრალ - ხაშური- ხარაგაული-ზესტაფონის მონაკვეთის მოდერნიზაციის პროექტის განხორციელების მიზნით მიიღო.

დოკუმენტით „საქართველოს რკინიგზა“ განკარგულების ძალაში შესვლიდან ორი თვის ვადაში ვალდებულია, საქართველოს გარემოსა და ბუნებრივი რესურსების დაცვის სამინისტროს შესათანხმებლად წარუდგინოს საქართველოს წითელ ნუსხაში შეტანილი მცენარეების ბუნებრივი გარემოდან ამოღებით ბიომრავალფეროვნებისათვის მიყენებული ზიანის საკომპენსაციო ქმედებების პაკეტი.

აღსანიშნავია, რომ გასულ კვირას წითელ ნუსხაში შეტანილი 63 ჩვეულებრივ წაბლის მოჭრაზე უფლება ხელვაჩაურის სოფელ კირნათის მიმდებარე ტერიტორიაზეც გაიცა.