ქალის კუბო, რომელიც ქაბულში ტყუილი ბრალდებით ჩაქოლეს, ქალებმა გამოასვენეს, რითაც მათ ავღანური დაკრძალვის წესი დაარღვიეს.

ფერჰუნდეს დაკრძალვას ასობით ადამიანი დაესწრო. ისინი ქალის მკვლელების დასჯას მოითხოვდნენ. ფერჰუნდეს ყურანის დაწვაში ედებოდა ბრალი, თუმცა ოფიციალურმა გამოძიებამ დაადგინა, რომ ამის მტკიცებულება არ არსებობს.

კეტებითა და ქვებით შეიარაღებულმა მამაკაცების ბრბომ ფერჰუნდე ჩაქოლა და მის ცხედარს ცეცხლი წაუკიდა. გავრცელებული ინფორმაციით, პოლიცია ამ ყველაფერს შორიდან უყურებდა. ჩაქოლვის ამსახველი კადრები სოციალურ მედიაში გავრცელდა.

ავღანეთის პრეზიდენტმა, აშრაფ განიმ საქმის აღძვრა მკვლელობის მუხლით მოითხოვა.

„ფერჰუნდე სრულიად უდანაშაულო იყო“, - ავღანეთის შს მინისტრმა, გენ მოჰამად ზაჰირმა განაცხადა, რომ 13 ადამიანია დაკავებული, მათ შორის, პოლიციის 8 ოფიცერი.

ტყუილი აღმოჩნდა მანამდე გავრცელებული ინფორმაციაც, თითქოს ქალს ფსიქიკური პრობლემა ჰქონდა.

წყარო: BBC