საქართველოს თავდაცვის მინისტრის მრჩევლად პარლამენტის თავდაცვისა და უშიშროების კომიტეტის წევრის, ლუკა კურტანიძის მეუღლე ხათუნა მიქაცაძე დაინიშნა, რომელიც პიარის კუთხით იმუშავებს. როგორც მიქაცაძემ „ინტერპრესნიუსთან" საუბრისას აღნიშნა, უწყებაში მუშაობა მარტიდან დაიწყო.
მოსაზრებას, რომ თავდაცვის სამინისტროში, აღნიშნულ თანამდებობაზე მეუღლის, დეპუტატ ლუკა კურტანიძის დახმარებით დაინიშნა, ხათუნა მაქაცაძე კატეგორიულად უარყოფს და აცხადებს, რომ პიარის სფეროში მუშაობის მრავალწლიანი გამოცდილება აქვს.
„იმისთვის, რომ ვიღაცას წარმოდგენა არ შეექმნას, თითქოს არსად არ მიმუშავია და თავდაცვის სამინისტროში უცბად გავჩნდი, მინდა განვმარტო, რომ წლების წინ დავიწყე მუშაობა: ჯერ იყო ჟურნალისტთა საერთაშორისო ალიანსი, მერე ჩაჩავას სამეცნიერო კვლევითი ცენტრი, სადაც პიარის ხელმძღვანელი ვიყავი, ამის მერე ვმუშაობდი პარლამენტის საფინანსო-საბიუჯეტო კომიტეტის აპარატში, იყო ფინანსთა სამინისტრო, იყო „ფლაი ჯორჯია“, „ზედაზენი“, სადაც ასევე პიარის ხელმძღვანელად ვმუშაობდი და ა.შ. რაც შეეხება ჩემს მეუღლეს, მე და ლუკა წელიწად-ნახევრის წინ დავქორწინდით, მე კი საქმიანობაში 1996 წლიდან, აქტიურად ვარ ჩართული", - აღნიშნა ხათუნა მაქაცაძემ.
