C ჰეპატიტის ელიმინაციის პროგრამის ფარგლებში  ანტივირუსული მკურნალობის დაწყებისა და პაციენტების შერჩევისას პრიორიტეტი შემდეგ ჯგუფებს მიენიჭებათ:

• პაციენტებს ღვიძლის კომპენსირებული ციროზით (F4); 
• პაციენტებს  ღვიძლის შორსწასული ფიბროზით (F3); 
• პაციენტებს ღვიძლის დეკომპენსირებული ციროზით (ღვიძლის ტრანსპლანტაციის კანდიდატები);
• პაციენტებს ღვიძლის ტრანსპლანტაციით და HCV რეინფექციით;
• პაციენტებს HCV ინფექციის კლინიკურად მნიშვნელოვანი  ექსტრაჰეპატური გამოვლინებებით. მაგ, მე-2 და მე-3 ტიპის შერეული კრიოგლობულინემია (მაგ. ვასკულიტი), პროტეინურია, ნეფროზული სინდრომი ან მემბრანოპროლიფერაციული გლომერულონეფრიტი, დამაუძლურებელი სისუსტე, შაქრიანი დიაბეტი ტიპი 2, კანის გვიანი პორფირია, და სხვ.;
• პაციენტებს აივ და/ან HBV კონფექციით;

ამის შესახებ დღეს ჯანდაცვის სამინისტროში გამართულ პრესკონფერენციაზე გახდა ცნობილი.

სამინისტროში აცხადებენ, რომ პაციენტი უნდა დარეგისტრირდეს „სოციალური მომსახურების სააგენტოში ან მის ფილიალებში ქვეყნის მასშტაბით, სადაც მან ან მისმა კანონიერმა წარმომადგენელმა უნდა წარადგინოს ჯანმრთელობის მდგომარეობის შესახებ ცნობა – ფორმა NIV-100/ა (დედანი), მკურნალობაში ჩართვის წინ ჩატარებული კვლევების დოკუმენტები (დასაშვებია მხოლოდ საქართველოში მოქმედი კანონმდებლობის ფარგლებში შესაბამისი საქმიანობის უფლების მქონე დაწესებულებებში ჩატარებული კვლევის წარმოდგენა), პირადობის მოწმობის ასლი და შეავსოს შესაბამისი ფორმის განაცხადი. ამასთან, პაციენტი ირჩევს სერვისის მიმწოდებელ დაწესებულებას, სადაც სურს მომსახურების მიღება.

უწყებაში განმარტავენ, რომ დარეგისტრირებული პაციენტის დოკუმენტაციას კომისია განიხილავს და დადებითი გადაწყვეტილების შემთხვევაში, გაიცემა თანხმობის წერილი. წერილის მიღებიდან კი პაციენტმა 7 კალენდარული დღის განმავლობაში უნდა მიმართოს შესაბამის დაწესებულებას მკურნალობის დასაწყებად. წინააღმდეგ შემთხვევაში, თანხმობის წერილი გაუქმებულად მიიჩნევა. რეგისტრაციისათვის კი პირადობის მოწმობის ასლისა და ჯანმრთელობის მდგომარეობის შესახებ ცნობის (ფორმა NIV-100/ა) წარდგენა დასჭირდებათ.

პროგრამაში ჩართვამდე ჩასატარებელი კვლევები: 

C ჰეპატიტის ვირუსის საწინააღმდეგო ანტისხეულებზე დადებითი შედეგის მქონე პაციენტებს პროგრამის ფარგლებში უტარდებათ მკურნალობაში ჩართვამდე აუცილებელი კვლევები შემდეგი პრინციპით:

ა) ექიმთან ვიზიტი;

ბ) სისხლში HCV რნმ-ის რაოდენობრივი განსაზღვრა PCR მეთოდით;

გ) HCV რნმ დადებითი შედეგის მქონე პაციენტებს უტარდებათ სისხლის საერთო ანალიზი, ღვიძლის ფუნქციური სინჯები (ALT, AST კვლევები) და ღვიძლის ფიბროზის ხარისხის განსაზღვრა FIB-4 ტესტის დათვლით;

დ) იმ შემთხვევაში, თუ FIB-4 ქულა არის 1.45 - 3.25 მაჩვენებლებს შორის, პაციენტებს დამატებით უტარდებათ ღვიძლის ელასტოგრაფია;

ე) FIB-4 ტესტისა და ღვიძლის ელასტოგრაფიით გამოვლენილ ღვიძლის ფიბროზის F3, F3- F4 და F4 ხარისხის მქონე პაციენტებს  უტარდებათ შემდეგი გამოკვლევები:

ვ) HCV გენეტიკური ტიპის განსაზღვრა PCR მეთოდით;

ზ) HBsAg, Anti-HBs, G-GT, ტუტე ფოსფატაზა, ბილირუბინი (პირდაპირი და საერთო), კრეატინინი, გლუკოზა, ალბუმინი, INR, ANA, TSH, მუცლის ღრუს ულტრაბგერითი გამოკვლევა;

თ) პაციენტებს HCV ინფექციის კლინიკურად მნიშვნელოვანი  ექსტრაჰეპატური გამოვლინებებით (მე-2 და მე-3 ტიპის შერეული კრიოგლობულინემია (მაგ. ვასკულიტი), პროტეინურია, ნეფროზული სინდრომი ან მემბრანოპროლიფერაციული გლომერულონეფრიტი, დამაუძლურებელი სისუსტე, შაქრიანი დიაბეტი - ტიპი 2, კანის გვიანი პორფირია, და სხვ.), ასევე აივ და/ან HBV კოინფექციით, უტარდებათ ქვეკომპონენტით გათვალისწინებული ყველა კვლევა.

ჯანდაცვის სამინისტროს ინფორმაციით, პროგრამაში ჩასართავად საჭირო კვლევის საფასურს საქართველოს სოციალურად დაუცველი მოსახლეობისთვის სახელმწიფო თავის თავზე იღებს. მათ კვლევებს 70%-ით ჯანდაცვის სამინისტრო, 30%-ით კი ადგილობრივი თვითმმართველობები დაუფინანსებენ. C ჰეპატიტის ვირუსის მქონე ყველა სხვა მოქალაქეს ჯანდაცვის სამინისტრო  კვლევების საფასურის 30%-ს დაუფინანსებს.

რაც შეეხება მკურნალობის ხარჯებს, როგორც სამინისტროში ამბობენ, ამის შესახებ 21 აპრილს გახდება ცნობილი, როდესაც ხელი მოეწერება ურთიერთგაგების მემორანდუმს საქართველოს მთავრობასა და კომპანია „გილეადს" შორის.

უწყებაში აღნიშნავენ, რომ პეგილირებული ინტერფერონისა და რიბავირინის გაცემა პაციენტზე სამკურნალო სქემის შესაბამისი რაოდენობით გაიცემა და მას სერვისის მიმწოდებელი უზრუნველყოფს (არაუმეტეს ერთი თვის მარაგისა).

სოფოსბუვირს, ასევე სერვისის მიმწოდებელი გასცემს და მისი რაოდენობა 1 ბოთლი (28-ტაბლეტიანი) იქნება.

როგორც სამინისტროში ამბობენ, სავალდებულო იქნება, რომ ბოთლი გაიხსნას ადგილზე და პირველი აბი პაციენტმა მიიღოს სამედიცინო პერსონალის თანდასწრებით, კამერის მეთვალყურეობის ქვეშ. პაციენტს გადაეცემა ბოთლი, რომელშიც არის 27 ტაბლეტი სოფოსბუვირი.

თუმცა, სამინისტროში ამბობენ, რომ პაციენტთა რეგისტრაცია მიმწოდებელი დაწესებულებების გამოვლენის შემდეგ დაიწყება.

„სტატია მომზადებულია ევროკავშირის  მიერ დაფინანსებული პროექტის „მტკიცებულებებზე დამყარებული ჩარევა წამალდამოკიდებულთა უფლებების დასაცავად საქართველოში“ ფარგლებში, რომელსაც ახორციელებს „ზიანის შემცირების საქართველოს ქსელი“.  პროექტის თანადამფინანსებელია ფონდი „ღია საზოგადოება საქართველო“. სტატიის შინაარსზე სრულად პასუხისმგებელია ავტორი და არც ერთ შემთხვევაში არ შეიძლება ჩაითვალოს ევროკავშირის პოზიციის გამომხატველად”.